យើងជានរណា?
ទិដ្ឋភាពទូទៅ
អង្គការ គណៈកម្មាធិការសហប្រតិបត្តិការដើម្បីកម្ពុជា (គ.ស.ក.) គឺជាអង្គការសមាជិកភាពឈានមុខសម្រាប់អង្គការមិនមែនរដ្ឋាភិបាលក្នុងស្រុក និងបរទេសនៅក្នុងប្រទេសកម្ពុជា។ អង្គការ គ.ស.ក. មានសមាជិក២០០ អង្គការ ដែលធ្វើការងារអភិវឌ្ឍលើវិស័យផ្សេងៗ។ គ.ស.ក. បានដើរតួនាទីជាពិសេសក្នុងនាមជាអ្នកសម្របសម្រួល អ្នកឃ្លាំមើល និងអ្នកតស៊ូមតិ ដើម្បីបរិយាកាសអំណោយផល និងមជ្ឈមណ្ឌលធនធានប្រកបដោយនិរន្តរភាពសម្រាប់អង្គការសង្គមស៊ីវិលនៅថ្នាក់ជាតិ និងថ្នាក់ក្រោមជាតិ។
ទស្សនវិស័យ
ការអភិវឌ្ឍប្រកបដោយនិរន្តរភាពនិងប្រជាធិបតេយ្យសម្រាប់ប្រទេសកម្ពុជា
បេសកកម្ម
ក្នុងនាមជាអង្គការសមាជិកភាព គណៈកម្មាធិការសហប្រតិបត្តិការដើម្បីកម្ពុជា ធ្វើការក្នុងភាពជាដៃគូដើម្បី អភិបាលកិច្ចល្អ បរិយាកាសអំណោយផល និងនិរន្តរភាពនៃអង្គការសង្គមស៊ីវិលនៅកម្ពុជា
គោលដៅ
ពង្រឹងអង្គការសង្គមស៊ីវិល ដោយផ្តល់អោយពួកគេនូវបរិយាកាសអំណោយផល និងលំហរប្រជាធិបតេយ្យ
គុណតម្លៃ
- សុចរិតភាព
- ភាពឆ្លើយតប
- កិច្ចសហប្រតិបត្តិការ
- គុណភាព
- បរិយាប័ន្ន
សារពីលោក ច័ន្ទ ភក្តី នាយកប្រតិបត្តិ
សូមស្វាគមន៍មកកាន់គេហទំព័រគណៈកម្មាធិការសហប្រតិបត្តិការដើម្បីកម្ពុជា (CCC)។
អស់រយៈពេលជាងបីទសវត្សរ៍មកហើយ អង្គការ គ.ស.ក បានដើរតួនាទីជាវេទិកាសមាជិកភាពដែលគួរឱ្យទុកចិត្ត តំណាងឱ្យអង្គការសង្គមស៊ីវិលនៅក្នុងប្រទេសកម្ពុជា។ គេហទំព័ររបស់យើងបម្រើជាបណ្តុំព័ត៌មានប្រកប ដោយការទទួលខុសត្រូវ តម្លាភាព និងចុងក្រោយបំផុតអំពីកម្មវិធីរបស់អង្គការ គ.ស.ក អង្គការសមាជិក និងទិដ្ឋភាពទូទៅរបស់សង្គមស៊ីវិលនៅក្នុងប្រទេសកម្ពុជា។
តាមរយៈគេហទំព័រនេះ យើងមានសេចក្តីរីករាយក្នុងការបង្ហាញសកម្មភាពស្នូលនៃកម្មវិធីមជ្ឈមណ្ឌលអភិបាលកិច្ច (GHP) របស់អង្គការ គ.ស.ក ដែលបច្ចុប្បន្ននេះចូលដល់ដំណាក់កាលទីប្រាំហើយ (២០២៤-២០២៨)។ ទាំងនេះរួមមាន ឧបករណ៍និងប្រព័ន្ធសម្រាប់អភិបាលកិច្ច ការកសាងសមត្ថភាព និងការរៀនសូត្រ មជ្ឈមណ្ឌលធនធានសម្រាប់អង្គការសង្គមស៊ីវិល ការស្រាវជ្រាវ ការចូលរួមពហុភាគី ភាពជាដៃគូប្រកបដោយបរិយាបន្ន យុទ្ធនាការ និងការតស៊ូមតិ ព្រមទាំងបច្ចេកវិទ្យា និងភាពច្នៃប្រឌិត។ កិច្ចខិតខំប្រឹងប្រែងទាំងនេះឆ្លុះបញ្ចាំងពីការប្តេជ្ញាចិត្តរបស់អង្គការ គ.ស.ក ក្នុងការពង្រឹងអង្គការសង្គមស៊ីវិល និងលើកកម្ពស់បរិយាកាសអំណោយផល និងការអភិវឌ្ឍប្រកបដោយចីរភាព។
ខ្ញុំជឿជាក់ថាព័ត៌មានដែលបានចែករំលែកនៅលើគេហទំព័រនេះនឹងមានប្រយោជន៍សម្រាប់ការសម្រេចចិត្តប្រកបដោយព័ត៌មានគ្រប់គ្រាន់ ជួយដល់ការធ្វើសកម្មភាពរួមគ្នាដើម្បីដោះស្រាយបញ្ហាប្រឈមនៃការអភិវឌ្ឍន៍ និងរួមចំណែកដល់ប្រសិទ្ធភាពនៃការអភិវឌ្ឍន៍ និងការរីកចម្រើនប្រកបដោយចីរភាពសម្រាប់ប្រជាជនកម្ពុជា។
ក្នុងនាមជាអ្នកសម្របសម្រួលរវាងសង្គមស៊ីវិល រដ្ឋាភិបាល ដៃគូអភិវឌ្ឍន៍ និងអ្នកពាក់ព័ន្ធផ្សេងទៀត អង្គការ គ.ស.ក នៅតែប្តេជ្ញាចិត្តក្នុងការពង្រីកសំឡេងរបស់សមាជិក និងសម្រួលដល់កិច្ចសហការក្នុងភាពជាដៃគូ។ អង្គការ គ.ស.ក ទន្ទឹងរង់ចាំបន្តកិច្ចសហការជាមួយលោកអ្នក ហើយសូមកោតសរសើរយ៉ាងជ្រាលជ្រៅចំពោះការគាំទ្រជាបន្តបន្ទាប់របស់លោកអ្នក។
យើងក៏ស្វាគមន៍យ៉ាងកក់ក្តៅចំពោះមតិយោបល់ណាមួយដែលអ្នកអាចមាន តាមរយះតំណភ្ជាប់នេះ